Heimatverein Rauenstein

Kirmesspruch 2025

Schö ümmer woarsch su, un su sölls a blei,

wenn Pfingstn is, söll a unner Kerwa sei.

Es is nu suweit, un mir wölln uns frä

do stett die Kerwa von Rauestä.

Nu muß me ä an su an Dooch

zu manchen Leutna a poar Wörter sooch.

Dös is ja a Selbstverständlichkät,

de ää ärchert sich, de nächst hot sei Frääd.

Ich begrüß euch nu ölla, wie ihr doo seid,

Wenn da Pfingstmadich in Rauestä bist, bista richtich gscheid!

Des letzta Jubiläum hamme gut künn verkraft,

un beim Schreim von dan Sprüchla gleich in nächstn Geburtstag ausgemacht:

20 Joahr is uns namlich mittlerweil a Zeltkerwa gelunga,

Un genau su lang hamme unter dare Lindn des Tanzbä gschwunga.

Gießerträcher, komm schenk mir und de Lindn äs ei, des bringt Glück,

Des Baamla doo, me wölln uns ja noch a poar Joahr demit schmück.

Zwölf Paarla hamme heuer zamm gebracht,

me hamm schö über an Doppelstock-Tanzboden nachgedacht.

Achja! Tanzboden.

Do gedd mei erschta Gschicht nämlich scho aa,

nur semme salber mitn Ärchern dra.

Vor fünf Joarna hamme von unra Heinzelmänner an nagelneun Tanzboden kricht,

me musstn nur wegen Corona, auf are grossn Einweihung verzicht.

Wemme nochmol 5 Joar woarten, fängts a dess sich die Balken biegen,

oder - naja, ich sooch wies is: döss immer marra von die Schöpfer unter de Arden liegen.

In 5 Jahres Test hot de Tanzboden einwandfrei bestann,

Weil spätestens heit hamm nämlich 50 Leut gleichzeitig auf dann Bratterna gstann.

Komm Pauline weih na ei,

und Gießerträcher, schenk me gleich noch ääs ei.

Auf die Heinzelmänner! Prost!

Unner nächsta Gschicht fällt nei de Kategorie:

Wos verschenk ich an meina Liebsten?

Oder wu schick ich sa mol hiiee?

A Buch liester ne un Schmuck machter ne naa,

mitn Socken stricken bin ich a ze spaat dra.

Ach, su a Wellnessbehandlung, des ka su verkehrt ne gsei,

nimmst an Gutschein und tust na nei an schön Tütla nei.

Gesagt - getan, die Fraa is fruu,

denn bis zum Geburtstag von unnern Ma hot sa ihr Ruh.

Unner Maa da frääd sich wie verrückt,

und zack hotter a scho sei Telefon gezückt.

De Termin stett und is fett im Kallenner markiert,

nur die Fra von de Wellnessoase, wess noch ne, wos gleich passiert.

Gebucht woar a medizinischa Fußpflege über are vierteln Stunn,

inklusive Fußbad, Feile, Creme… un un un.

Doch wu die Fraa die Füß von unnern Maa sieht, verschlägts re fast die Sprooch,

alsu wie dös aussieht, do bräucht ich kenna Minuten, sondern an halbn Dooch!

Also raspelt und feilt die Fraa sich enn ooo,

oue sie is weit entfernt von „weich wie ein Babypopo“.

Ach is des schö, denkt sich degege unner Maa,

die Fraa hot magischa Händ, do is ja kaum noch a Hautschüppla dra!

Nach 40 Minuten is die Behandlung beend,

un unner Maa, da hot kaum seina eechna Füß wieder dekennt.

De Maa gedd glücklich hemm, die Fraa muss erstmol grundsanier,

alsu na – suwas hott ich a noch ne hier.

Des Fußbad is a Draack-Brüh, danabe die Säuerei,

ich hoff, da kümmt suu schnell nimmer bei mir rei.

Unner Maa hot gleich seiner Schenkerin von sein Erlebnis bericht,

alsu suwas schöss – dös woar a Gedicht.

Ober: Wenn ihr fei jetzt denkt, do hot die Story doch trotzdam a Happy End,

des is weil ihr noch ne ölles von dare Gschicht kennt.

Denn seitdem gibt’s in dare Praxis nur noch Gutscheine für die Leut Gutscheine ze keffn,

die NED Hubert von Möscheboch hessn.

Gießerträcher, du willst me ne a mol wos schenk???

es muss a ke Fußpflege sei, es reicht a Getränk.

Äfich mol flanier- unter an annern Dach

A klenna Auszeit vom Alldouch

Su wie‘s jeder Mouch

Urlaub is a —-

wenn dä vom änn oder annern mol Host dei Ruh

……ghört halt a de äächn. Nachber dezu

Beim schönnstn Wadder - zusäähen die Bäärch spitzen

De Helm uffn Kopf, die Radlerhuesen sitzen

unner Maah schwingt sich aufn Drahtesel

Und los gehts, …..sei Gfeeehsel

Ah Fahrradtour durchs Tiroler Land

die Route gecheckt mit mit Hilfe de nahe liegenden Touristenwand

Irchendwuu in de Prärie

Auf arä Schnellstroohs -mal kurz die Urlaubs Idylle ruht

streift unnern Määäh a fremmer Fohrradfohrer -mit ze viel Mut

Im Karacho und Schneller wie de Blitz

Und Achtung !!! - im Anschluss folcht de Witz

Dääh Raaahser schnippt na die Vorfahrt und fährt wie de Schnellzuug vurbei,

es bleibt kaum noch Zeit für ä ordentlichs Gschrei

„Du Orschloch, du bist noch ganz dicht!

Du nimmst me die Vurfohrt, und beinah mei Laahmslicht!

Kopfschüttelnd und vuller Zorn,

is äh ball nimmer worn,

als däh verrückt Fahrradfohrer ah noch stänn bleibt , und wort noch ganz vorn -

Geht auf na zu und nimmt sei Sunnabrill runter

„Und hält die Begegnung für a fätzn Wunder!!!

Andreas, Mensch Grüß dich, was machst du denn hier?

Bist du auch zum Urlaub machen, so wie wir?

Däh Raaahser auf’n Fohrrad entpuppt sich doch glatt als de Nachber von nebenan..

me sieht sich ja meistens, -wenns kä sau braucht-… ja genau dann

Räuestäner triffst da überroohl,

Dou kannsta noch so weit fort,

A fremmer Kontinenent, kaaaahs gsei,

Du Triffst immer än Räuestäner - su nammt mich beim Wort!!!

Und wenn de Nachber Hartmann hässt ,

dänn triffsta uffn Fohrrad - selbst im klännsten Nest

Wir trinken aufn Samel und sein Nachber

Und gäbn beide in Tipp: plant und besprächt euern nächsten Trip.

Dös nächsta Sprüchlä, do drauf wollt ich heit ne verzicht:

Es fällt nei de Rubrik "Eikäff-Missgschick-Bericht".

Noch de Ärbet gett unner Frä nein REWE nei,

me will ja schließlich für's Wochenend vürbereit sei.

Es dauert net lang un de Wochn is vull,

Flääsch, Gemüs un wos zätrinkn - es is ölles do wos sä wollt hull.

Demit sä jetzt nümmer vill Zeit verliert,

wird ölles nein Kofferraum manövriert.

Als sä dann nein Auto eiwillsteich,

wörd sä ärschtmol kreidebleich.

Die Fohrertür gett nämlich nümmer auf,

de Schlüssel licht im Kofferraum gleich näbern Wochenendeinkauf.

Die Lösung für dös Problem is ober nah,

sie ruft äfich ihr Mädlä a.

Denn die is grad im Goarten dehämm,

un künnt re in Ersatzschlüssel rüber gebräng.

Wumit me ober ä schö beim zwätten Problem sänn,

un dös kann unner Frä sehr gut durch die Heckscheib erkenn.

Ihr künnts euch sicher gedenkt, hier ober noch die Eckdaten:

Dort drin licht ihr Handy - direkt näber die Rouladen.

Ohnä Handy und ohnä Handynummer,

ä werd net wenger - de Frä ihr Kummer.

Ober ä die Aufrechung hott sich schnell gelecht,

am REWE-Info-Stand wird noch än Telefonbuch gfreecht.

Beim Durchblettern kümmt res ober nein Sinn:

"Handynummern stänn do heitzetoch doch goar nümmer drin."

Dös woar de dritt Nackenschlach in kurzer Zeit,

ober zegoar dodefür hot sä ä Lösung bereit.

Unter "R" - wie Rauestä un "W" wie Wirtshaus wird sä fündich,

"'Steffi's Bierkeller', do bin ich richtich."

Die Steffi als letzter Helfer in der Not,

hullt unnerä Frä ihr Mädlä mit ins Boot.

Noch kurzen Schmunzeln über de Mutter ihrn Malleur,

wörd sä in Ersatzschlüssel sei Chaffeur.

Die Gschicht nimmt letztlich noch ä gutts End,

un gleich dehämm wird sich ä frischer Rotkäppchen ausn Kofferraum gegönnt.

Gießerträcher, mach mol vull mei Glos,

ich will trink auf die Nachberschaftshilfen aus de Weststrooß.

(Prost Elke)

Is Autofahrn is bekanntlich nex für mancha Leut,

Su geht’s a in Maa in därra Gschicht, es macht na käää großa Freud

Es is für na a weng a Qual,

Aber an dann dooch hat er ja kä annera wahl.

Denn er hat seiner frah versprochen er holt sa mitn auto ab ,

er fragt sich aber scho salber wie des söll klapp

Es nützt na jetzt aber a kää jammerei

Un scho steicht er nei sein Autola ei

In sein übereifer denkt sich noch ,

ich muss ja nur auf coburg da kann ich ne viel falsch gemach,

des is ächentlich a totsichera sach

Mir wissen net wie der ma nach coburg is gekumma

oder wie viel stunn des hot in Anspruch genumma.

Fakt is er fährt nein westen nei ,

Un wess nur sei frah muss irgendwo bein coburger Bahnhof sei.

Wer sich im westen drüm a wengla auskennt der wess wu ra lang muss fohr ,

für dan mah war des allerdings ne su kloar

Er fährt vorbei am Froschgrundsee, kurz vor Rödental auf de umgehung drauf un weiter uff de Autobahn.

Bei de Ausfahrt nach Coburg wäre dann a scho do gewesen,

De Moment um ohzebiechen, unne mah is lieber noch ma uffs Gaspedal gstiechen.

Ihr Leut , Ich kanns net verstieh des er sich kää weng wunnert,

Aber er is wirklich bis nach Eisfeld gedunnert.

Mancha leut fahren net gut Auto, des is ja bekannt,

obe su ä Ausmaß is dann doch öllehand.

Er konnt aber dann in Eisfeld zum Glück noch gewend,

Sonst hätt die Geschicht wahrscheinlich gor kää End

(Sonst wär sei foahrt vielleicht erscht in Erfurt geend.)

Mit etwas Verspätung is er dann doch noch a gekumma,

sei frah denkt sich hätt ich mol lieber in bus genumma.

Autofahrten mitn urmel wie des halt meistens su is,

Dauern meist a weng länger suwass muss ma halt wiss

Giserträcher des dewache musst du aber net su langsam sei,

komm schenk me noch schnell äs ei.

Ach und Urmel,

Dass da ne wesst wie me sei Fraah von A nach B chauffiert,

ober noch schönner is: des des Laafn aaaa ne funktioniert!!!

Ihr habt ja zammgepackt eura Sachn,

ümm am Wahlsunndich euer Kreuzlä ze machn.

Quär übern Fäld – unn in Steichlä nei,

dös sollt euer Wäch zum Wahllokal sei.

´S Steichlä woar knanschich unn rutschich – jede Wett,

ihr künnts euch wahrscheinlich ölla gedenk – wie unner Gschichtlä wedde gett.

Net uffn Wäch geklotzt, unn mit die Gedanken schö im Wahllokal dinn,

flädderts in Urmel schööööö de Längs noch hinn.

Zwä Männer eiln gleich hi – unn stelln nä widder auf,

unn setzn gleich noch a lockersch Spruchlä drauf.

„Jetz bistä ober schöö auf dänn BRAUNÄ Schlamm ausgezischt,

komischer Weis hots dei Frä uff de GRÜNÄ Wies nett

dewischt.“

Allä gelääf kunnt unner Ma dann nimmer,

die Schmärzn wurden immer schlimmer.

„Ober äs sooch ich euch“ stöhnt unner Ma,

unn lääht sich an dänn Kerwaszaun na.

„Bevur hier die Rettung kümmt mit vill Krach,

will ich äscht noch mei Kreuzlä mach!“

Mit letzter Kraft wird dös Kreuzlä gemacht unn do debei die Zäh zamm gebissn,

gstützt von 2 Männer dänn Wahlschein fix noch nei däre Urnä gschmissn.

A kummä uffn Kerwasplatz werd unner Ma noch in Stellung gebracht – es ist net ze soochn,

unn do kümmt de a schö – de agfordert Rettungswoochn.

Jetz kummä die 2 Hälfer nochmool su richtich uff Tourn,

fliecht unnern verletzten Ma schö dös nächste Sprüchlä ümm die Uhrn.

„REINHARD – dös ka net dei Krankenwoochn gsei,

dä fehrt nämlich mit BLAUN Lecht – unn net mit GRÜNÄ ei!“

Die Sanitäter checken ne durch, unn kummä zum Entschluß…

Tja Urmel – wos muss dös muss.

„Fe dich iss de Dooch geloffn – fe heit bistä raus,

inn Rest von dein Sunndich verbrängstä im Sumbarcher Krankenhaus!“

Sei Frä klärt mit die Retter inn Papierkrich unn a poar annerä Sachn,

manchä tunn fix noch a poar Bilder fenn Familienalbum machen,

kurz drauf fliecht zu die Rettungswoochntür,

suuu stellt me sich doch an Wahlsunndich für.

Mir trinken uffn Urmel sein Muskelfaserriss,

unn hoffn dös ölles halbwächs widder in Ordnung iss.

Drüm Reinhard – loss de halt sooch,

a gscheits Schuhwärk iss gold wärt an knanschicher Dooch!

PROST

A Ma aus Raustä hot sich nex schlimms debei gedacht,

unn sich uffn Wäch nei unnere Kreisstadt gemacht.

Bestens vürbereit gett de do hii,

su dös ächentlich nex schief ka gegieh.

Die Foahrt gett los – dös Ziel iss bekannt,

nächster HALT – Sonneberger Landratsamt.

In de zwättn Etasch do sitzt dann die Frä,

wure gärn sei Gäld los mücht gewähr.

Die wiederüm secht ne ober dann,

dösse sei Gäld im Ärdgschoss am Kassenautomat los gewähr kann.

Widder nunter gerennt – unn dort gibt’s in nächtsn Hieb,

am Kassenautomat hängt a Zettl – AUSSER BETRIEB!

Mit Wut im Bauch getts widde naufwärts in dänn Treppenhaus,

unn ohm akummä – platzts dann äfich aus ne raus.

„Sochte mool – ihr in eure zättn Etasch, ihr wisst wohl net,

dös unten am Eingang euer Automat net gett?

Ich bin doch net do, üm dös Landratsamt ze dekunden,

weder do hohm – noch a Etasch wedder unten.“

Ohnä dös die Frä sich mit äre Antwort künnt gerett,

secht unner Ma: „Ich bezohl jetzt mit Koart – öb euch dös passt oder net!“

Dös hette mol lieber net söll soch,

denn wos jetzt kümmt – verschlächt än die Sproch.

Än Kuffer su groß wie a Einfamilienhaus,

zärrt die Frä aus ihrn Schreibtisch raus.

A Koartnzohlgerät von anno dazu mal –

Döt sochn kurz nochn Kriech auf jeden Fall.

Noch äre halbn Stunn Aufbau unn Aschließerei von dänn Ding,

secht sä: „Steck dei Koart nei unn gäbb ei dein PIN!“

Ich gläb jetz flippt unner Ma gleich aus,

dä zärrt nämlich sei Handy aus de Hosentasch raus.

„Doo iss mei Koart drauf gspeichert – unn guck mich jetzt net su a,

oder willst dä mir soch, dös dös dei Automat net ka?

Ich kriech gleich die Krise – dut do hinnä überhaupt wos genn?

Ich wollt ächentlich net mein ganzen Dooch hier verbräng.

Wesste wos – ehrs eskaliert - ich bin gleich widde doo,

ich heb halt jetz äfich a weng Boargäld oh.

Renn nunter - unn nauf noch a poar Stunn,

ich ho ja sünst nex wedde ze tunn!“

Multimedial unn digital söll ölles sei,

im Sumbarcher Landratsamt zieht wahrscheinlich dös Mittelalter widder ei.

Noch dezu kümmt dös genärvte – als öb se änn net verstänn,

ich gäbb euch an Tip – dutt wengstns su, als öb de gärn uff eure Arbet döt gänn.

FAZIT

Gehst du ins Sonneberger Landratsamt rein,

steck dir nur viel Bargeld ein.

Kondition, a poar Laufschuh unn a Brill fe de gutn Sicht,

Unn bloß känn Anschlusstermin – weil den schaffst du nicht.

PROST

A poar Leut´ muss ich ober noch benenn,

Weil ohne die - döt gornex genn.

Also kümmt als Letzts - wie sölls annersch sei,

die KERWAS-HOCHLÄBEREI.

Gedenk me unnern Jost Baumann,

der uns lange Jahre die Musik gemacht hat

Hoch läb sölln:

Die Gemäh ober vur ölln de Bauhof unn öllä seinä Mitarbeiter sölln hochläb.