Heimatverein Rauenstein

Kirmesspruch 2026

Ich grüß Euch sehr Ihr lieben Leut

zu unnern Kerwassprüchlä heit.

Vor allem unnre Bürgermästera will ich heit mol gsondert wink,

Sie sin ja heut a doo – na, also dös is ja a Ding.

Beim Waldfest-Gottesdienst hamme sa ja müss vermiss,

ke Wunner – wos will me denn in Rauestä, wenn in Suhl a fetziga Veranstaltung is??

Ke Angst, bei uns isses fei heit a su richtig schö - es is Sprüchleszeit,

in Rauestä - im schönstn Dörfla weit un breit.

Ihr wöllt wos hör, iiiichh muss mich ploch,

denn ich muss heit mein Spruch aufsoch.

Da Spruch wor heuer a schwiericha Sach,

denn wa will noch su a Arbet mach!

Ne wacher die Stories, dodeva gibt’s scho genuch,

nur.. es muss a enner schreib dann Spruch.

Su a kerwasspruch

Brängt sämtlicha Emotiona mit sich …

Jeds Johr aufs neua kümmt die äh oder Anner Kritik

- ode zumindest a skeptischer Blick.

Warüm bin iiiiech im Spruch- und wuhär wissen die dös scho widde

Seit wänn wärn Namä ins Spiel gebracht

Wiesu wärd hier net aufn Datenschutz geacht??

Diskriminiernd un geschäftsschädigend hässts jetzt,

und die Leut achten nur uff Etikette

Und wenns su wedde gett, lääs ich nächst johr wohrscheinlich unner Anklach vür

- üm jede Wette

Un früher worn die Sprüchla eh viel schönner gschrieeem –

hessts aus die klänn Grüppla am Rande

Früher kunntn die Leut vill mähra gegrööhl

- und dös hot me ghört bis drüm zum Böhl

Ja ihr Leut wie kaa mes denn sünst noch än rächt gemach-

dös die Leut lachen un känner muss häng sei Fläpp,

schickt me a Nachricht per Mail oder WhatsApp

an ichfindeesnichtlustigweilichdenspruchnichtgeschriebenhabe@gmx.de

Me dachtn dös is für unnern Maa die best Idee.

Dort kümme seina Gedanken geläs,

un a muss ne halb Rauestä vullkas.

Su… ich unterbräch erschtmol mei Aufregerei

Komm Gießerträcher, schenk erschtmol äs ei.

Prost

Also wenn Ihr lauscht, do denkt debei

es künnt heuer is letzta Mol gesei . . .

Döss des Sprüchla ke Künstlicha Intelligenz aushotspuckt,

Richtig echta Menschen hams gschriem..

un a noch salber ausgedruckt.

Meina Sprüchlesschreiber ham a poar Stories zammgedicht,

un mei Kerwasmädla hot schö enn Zettel aufn annern gebicht.

Vor de KI is Rauestä oue a ne verschont gebliem,

na – im letzten Joahr wurds ganza gor auf de Spitz getriem.

Erscht woarn die Zinselmännla zu die Backstreet-Boys mutiert,

un ham a Schlagerparty in Möscheboch eistudiert.

Ich glebb bei enn Konzert ho ich die die Helene Fischer dekennt,

achja und die Burgruina hot auf die Videos a scho gebrennt.

Am erschtn April is es dann auf sein Höhepunkt zugeloffen,

weil do is dann auf die Videos de Mount Rauestä ausgebrochen.

Vulkanausbruch in Rauestä, ach hör fei auf!

Suviel künnt ned mol UNNER Nico Lange gsauf.

Gießerträcher –

Ich will de jetzt a mol a KI-Sprüchla diktier:

Erstelle mir ein volles Glas – mit richtig echten Gießerbier.

Prost.

De ä oder anner Gedanke wird sich do drüm dränga,

worüm tun näbe mir zwä E-Mail Adressen hänga

IchwillunbedingtindenKirmespruch@web.de hamme eigericht,

weil me mittlerweile als Sprüchlesschreiber scho Privatanrufe kricht.

Unner zwätt Email Adresse leit diejenichen weiter,

Die unbedingt sich mol im Spruch wölln hörn,

Die tun sich an su än Spääßla wenig störn.

De ärscht hat sich namlich an än Sprüchlesschreiber Gewand

Und am Telefon sei ächnes Sprüchla diktiert un a scho Beispielsätz genannt.

„Des passt doch gut nei eure Kirmessprüchlesrundn rei-

ich wollt ja scho immer mol dou dinna sei“

Isse färtich mit Inhalt und Pointe,

dös Besta wor aber eh sei Tipp,

zammfassend de absolute Hit:

„Eura Sprüch müssn ja aweng Lustich sei

Da is es ja ah egal ob sich’s kaah gereim

Schmückt die Gschicht halt noch aweng aus,

Dicht ruhig was naaah, oue lass ja nex raus,

Inhalt muss ah net unbedingt sei,

Hauptsach ich hör mol mei Gschicht und bin endlich debei“

De Inhalt bestand aus äre Urlaubsgschicht

Und dou dezu wos na gedicht:

Im Familien Urlaub ze 4. ham sä in wichtigsten Kuffer an de Promenade lass stenn,

Und dehämm es Drama und dös ganz große Gflenn

De Inhalt woarn Bayern Trikots, und des net zu weng,

Die ganz Garderobe der zwä Bumm,

Dään Kuffer widder in kürzester Zeit ze säähn - dös schien erscht mol rum.

Doch die Alten hattn a blendenda Idee

Die Kinner fixe färtig, dös tat scho echt weh.

Angst üm den wertvollsten Inhalt der Kinner -

Die Alten mit ihrer Idee ober die wahren Gewinner.

Rasch nochmal an Urlaub ze zwätt ah gepeilt,

De verlurn Kuffer solang an de Rezeption verweilt.

De Kuffer wurd mit genumma und die Alten hattn nochmol drei schönna Douch am Strand,

Bevur es wieder zurück ging ins heimische Land.

Prost auf unnern neuen mobilen Sprüchlesschreiber von de Reitgass,

dä gar sehr gern Nikolaschka mouch ausn Fass.

Mir bedanken uns für die rege Anteilnahme und findens gut,

Des du zu die Leut ghörst, die mol über siich künna gelach,

Und me suwos nei aan Sprüchla kaah gemach

Du hast na ja im Endeffekt säälber gedicht,

Jegliche Beschwerden und Kritiken sänn sumit dann an dich gericht.

Gießerträcher, du kaast de echt a Scheib von unnern Ma runterschneid,

wesst: Ääää mol sälber die Initativen ergreif..

wenn du von dir aus a mol auf mich zu dötts genn,

döt ich jetzt ne mittn leern Gloos so stenn.

Prost

A Ma aus unnern Dorf, ä is jeden gut bekannt,

dä hott a neus Händy kricht – ganz modern un uffn öllerneustn Stand.

Des alda woar vom Runterfalln schö ganz schö zerfetzt,

er socht sich: „Dös neua brauch ich – un zwoar jetzt“

Drüm gette nauf zu sein Kumpel, „da hots mit de Technik drauf,

un namabei kümme gleich noch a Bierla gsauf.“

Im Käller ham ses gschafft noch ärä ganz‘n Weil,

Bilder neu, Kontakte neu, Apps neu – su söll’s sei.

Annerthalb Stunn, dann woar ölles gschafft,

dä Mann gett hämm - vull Zuversicht un Schaffenskraft.

Am nächstn Dooch, unner Maa is wach

nur dös Smartphone hot noch kenn Piepser wöll mach.

Gleich getter nochmol bei sein Kumpel vorbei,

„künnt me ne nochmol geguck – des ka doch ne gsei“

In de Mitt des Handy, die Manner namadra,

un beida gucken sa ihr Problemkind a.

Su a Handy braucht auf jeden Fall a Sim,

es stellt sich raus, die Koart is schöndemol gor ne erschd drin.

„Wenn ne mussta halt erschtmol dei Alts widder namm,

also vorausgsetzt, dös me des noochher ne higekriecht ham.“

Unner Ma socht: „Na, also dös is ja ke Option,

des Alta is platt gemacht, döss hot doch mei Sohn“

Do hot’s gscheppert bei öll’n zwänä zegleich,

unner Ma stett do – kreidebleich.

„Ha söll’s denn werklich möchlich sei?

Hott mei Jung jetzt öbber mei Neus debei?“

De Jung wird hä zitiert - dös Handy muss zurück,

Mit Ebay wär dös ne su äfich – also hotter ja noch Glück.

Sei Jung kümmt, die Handys wern wieder getauscht,

un a de Inhalt von enn widde aufn annern drauf.

Zur Entschuldigung socht unner Ma ganz locker dohä:

„Heit sähn die Händys doch ölla gleich aus –

schwoarz, glatt un schwä.

Früher hot mer’sch gleich gemärkt: Knöpfla un Antenn,

heit sieht äs wie’s ännerä aus – wie soll mer sei ächens denn dekenn?“

A poar Dooch gehn rümm, die Ruh kehrt ei,

do mälde sich nochmol – ganz nämäbei.

„Ich kumm jetz ächentlich ganz gut kloar“, sechte ganz fruh,

„Es gab bloß noch ääää kläss Malleur – us dös woar su:

Ich ho nämlich, un wänn is dös net ä schö mol passiert,

mei PIN dreimol falsch eigäm un domit dös Gerät blockiert.“

Nur dös Handy wor mol widde ned seis,

un a ne von sein Jung – sochemol macht da Maa dös denn mit Fleiß?

Diesmol hotter des Smartphone von seine Fraa eigfruurn,

für mancha Leut wär a Kabeltelefon besser, weil dös hot glebb ich noch nie enner verlurn.

Gießerträcher, schenk äs ei – ich ho nur Angst,

des du a in Waldi machst – un mir dös Falscha hä langst!

Prost

Bei unnerer nächstn Story geht’s um Hund, Katze, Maus –

oder wie kümmt me richtig kostengünstig mit sein Haustierla aus.

Unner Maa hot für sein Mali öllerhand Frasserei vom Eikäffn mitgebracht,

is ja manchmol su, döss me im Louudn an guttn Schnapper macht.

Sein ganzn Kaahler hotter mitn Kitkat aufgstockt,

un beim Eiräuma hot de Mali glücklich un zefrieden danabe ghockt.

„Komm mei Gudder, ich gab de gleich a Tütla, willst mol probier?“

Un de Mali hots neigschlabbert, ach is des a genüchsams Tier.

In nächstn Dooch hot unner Maa scho die Schachtel in de Händ,

ouh.. die Käsekissen – die wärn na schmecken, mein Klänn.

Jeds bröckla äzeln kriecht de Mali serviert,

zum Schluss kriechter a noch Katzn-Labeworschd an seine Gusch nagschmiert.

Noch an Dooch spater kümmt de Mali scho gornimmer zum Napf hiigerennt,

unner Maaa klappert un raschelt, dös is wie wenner sein ächna Katz nimmer dekennt.

Wos mach ich bloß mit dann Kater, ne dösser noch freckt,

müsst vielleicht mol mit na zum Oarzt - daa soll na mol check.

Da socht: „Ke Diagnos, ke Medikament, die Katz is in Schuss

a poar Kilos wenger künnter ghoo, is oue kä Muss.“

Die Bärch Katzenfutter bei unnern Maa wern ewig ne wenger,

un wenn de Kater durch de Klapp reispringt, wird’s immer enger.

Jetzt langts, dös guck ich me jetzt mol ganz genau a,

denkt sich unner Maa und es fällt na ei,

me ham doch a Überwachung am Eingang dra,

ich guck wos die Katz macht - un zwoar jeds Detail.

Un jetzt passt auf:

Auf de Kamera hot unner Maa sei Katz aufgenumma,

wie die immer von ihra Ausflüg wieder hemm is kumma.

Wenn ihr oue denkt, die hot efich bei de Minka drüm die Schooln laa gemacht,

na – de Mali hot seina Tütla äzeln und eigepackt salber mitgebracht.

Irgendwu hotter sich die dann los schmeck,

un in Müll woahrscheinlich a noch salbe nein galben Soock neigsteckt!!

Sei größta Aktion künnt scho rekordverdächtig gsei,

ode vielleicht äfich a riesengroßa Säuerei.

Auf enn Video hot unner Felix namlich 3 Kilo Trockenfutter durch Rauestä buxiert,

wie wenner grod mitn Bus in de Schalkner Norma woar un dös völlig ungeniert.

Achja..A kleptomanischa Katz in Rauestä – es is ke Witz,

Also wenn DÖS kä Videoidee für unnern KI-Künstler is.

Un irgendwu müsst ja jetzt enner ke Katznfutter mehr hou,

wer dazu an Hinweis hot – ach.. unner E-Mail stett ja eh scho dou.

Auf unnern Maa wo in halben Fressnapf laa hot gekefft,

un in Mali da kiloweise sei Whiskas salber hemm schlefft.

Prost

Wenn dehämm die Vorrät zu neige genn un ma nex mehr hot

Führt kää weg dra vorbei un me muss neis Eikäffen fort.

Su gehts a in Päärla aus unnerä nächsten Gschicht,

desdewegn fahrn sa zum Eikäffn nach sonneberg nei,

me will ja schließlich für die Woch vürbereit sei.

Nach einiger Zeit de wochen is vull

Sie ham alles besorgt was wollten hull.

Un nachdem ma sein Einkauf eingeladen hatt stück für stück,

bringt ma bekanntlich in Einkaufswagen wieder zurück.

Unner Maa secht zu seiner Frä: Ich mach dös setz dich scho mal nein Auto nei,

Des zurückbringä vom Einkaufswagen soll mei Sach sei.

Die Frä secht zu ihrn Maa: Des soll jetzt aber kä Stund dauer, nämm mich beim Wort,

schaff bitte nur dann Wouchen wieder fort.

Weil die Frä kennt ihrn Maa nur zu gut,

un wess des er sich gern ma festlabern tut.

Ihr könnt euch nu sicherlich gedenk des des net su ganz hat funktioniert,

Er labert nu un lässt sich net stressen - un hat dabei die Zeit vergessen.

Dann fällts na wieder ei un er sieht nu zu des er sich wieder aufn Wäch zu sein Auto macht

Un lässt dabei alles um sich rum außer acht.

Er setzt sich neis Auto, und wollt grad was sooch

Aber als er zu seiner Frä nüber kuckt trifft na de Schlooch.

Ihr Leut, wos ich euch jetzt erzähl suwas kann ja ächentlich garnet passier

Er sitz zwar im Auto un sieht sei Frä su wies söll sei, er is leider nur nei an falschen Auto nei.

Es is ja scho unwahrscheinlich des genau is salba Auto wie deis genau naber dir stett,

ober des is annera Auto ne abgeschlossen is des is ja a Fall von 1 zu 10000 des könnta gewett.

Axel wenn da is nächsta ma dei Frä warten lässt,

Pass halt auf des da nein richtigen Auto gehst.

Un su fällt die Gschicht nu nei de Rubrik:

A Nochn-Einkäffen-nein-Auto-einsteich-Missgeschick

Sooch amol Gießerträcher, muss ich de denn ölles sooch,

märkst net wie ich mich beim Lesen plooch.

Prost

Unner nächsts Sprüchlä fellt nei de Kategorie „Schlächts Gewissen“,

denn gläbt mesch, unner Raustä werd su allmählich zu ge schissen!

Beim Spazierngenn ka mesch gsäh und förmlich riechen,

überrool tun sötte Höfflä liechen.

Uffn Bürchersteich, vur die Haustürn unn mittn uff de Stroos,

wärn unnera 4Bäner ihre Gschäftlä los.

Dös dummä iss an däre Sach –

Wu sölln ses denn ä annersch mach ?

Denn wenn die Wurscht hausen iss, senn DIE mit sich im Reinä,

die Blödn, sänn ja wohl die 2Bäner am annern End de Leinä.

Die wissen nämlich net, wie su a Kotbeutel funktioniert,

die gucken noch zu - unn lääfn dann weiter – ganz ungeniert.

Aufheben und Entsorgen ? – weit gefehlt,

Hauptsach mei Hund hot gschissen – dös iss ölles wos zehlt!

Äs sei euch gsocht – die Leut von Raustä kennä euch genau – dös künnte gewiss,

unn wenns dännernä langt – finde in euerä Postkästen widder euern Hundeschiss.

Also Bücken, Tütchen drüber unn inn Schiss do nei,

dann iss vur jeder Haustür widder Schluß mit därä Säuerei.

Ä Liedlä von däre Säuerei tut a ä Goartnbesitzer ausn öbern Dorf singä,

Immer wennä in sein Goartn noochn rächtn guckt – tut de dort ä Wörschlä finnä.

„Wu kümmt denn dös hä – wä oder wos iss denn dös, wu suwos verliert ?“

Unn kurze Hand werd äschtmol a Wildkamera installiert.

Wos die zum Vorschein brängt – dös iss die Schau,

ümms genau ze soochn – Es kläbbt än kä Sau.

Känn Hoos, känn Fuchs – kä annersch Tier,

dä wu nei dänn Goartn scheisst – stett uff 2Bänna unn net uff 4.

Ja a Mensch – mann glaubt es kaum,

fe unnern Ma wie su ä bösser Traum.

Wenns dringend iss unns nex annersch gibt – kamme ja sei Notdurft mool verricht,

es kann ober net gsei, döss me zum Dauerscheisser werd – wie in däre Gschicht.

Ich bin bloß fruu - unn dös stell ich jetzt kloar,

dös dös Dilemma kä Rauestäne woar.

Ausn Nachbeschafftsortsdääl werd do heimlich agerückt,

unn in fremmä Gärtn mol äfich ä Wöschtlä o gedrückt.

Ich dacht immer, aus de Stadt kummä nur fürnähme Leut,

ober dänn Gedankn ho ich heit mit däre Gschicht ganz fix bereut.

Seid su gut unn losst eure Haufen in euern Ort liechen,

mit hamm genuch ze tun, unner ächens Problem nein Griff ze kriechen.

Also heb me unner Gloos – stoßen a wie die Kaiser,

unn sochn Prost uff unnerä Nachbern - die Schalkner Balkenscheisser.

Prost

Ke Angst, me ham dös wichtigsta Ding fei ne untern Tisch woll kehr,

unnern heilign Manzer wollt me halt erscht zum Schluss hii ehr.

A Insitution macht endgültig seina Schottn dicht,

wu söll me jetzt unnra Sammeln keff, wu noch de Zuckerguss dra bicht?

De ä oder anner hot scho dehemm sei Sauerteig-Brot ausprobiert,

oue an Bäck im Dorf, dann kaasta su fix ne reaktivier.

Die Ära Manzer is beend – dös dut uns a im Herzen wiieh,

wemme wos neus wiss wollt – do kunnsta (fast) immer hiie..

Vor de Hochlaberei – un bevür ölla an Thresen rammeln,

loss ma sa hochlaab – in Manzer, sei Brot un seina Freidichs-Sammeln.

Vivat – hoch

Und jetzt kümmt de Rest..

Denn a poar Leut´ muss ich noch benenn,

Weil ohne die - döt an de Kerwa gornex genn.

Also kümmt als Letzts - wie sölls annersch sei,

die KERWAS-HOCHLÄBEREI.

Die Gemäh, de Bauhof unn öllä seinä Mitarbeiter sölln hochläb.